.....أبي ..... وحشتني قوي
---------
يعني فجأة مشيت و غيبت
من غير ما حتى تقول سلام
يعني حقي ازعل اكيد
لو ماجتنيش في المنام
لأجل ماحكيلك همومي
نصلي و تبقى انت الإمام
هحكي ليك اللي بكَى
واللي جاني و أشتكي
ربك رحمه
كان من الوجع يعاني
بس عمره ما انحنَى
واللي قالوا عاشها راجل
بس خانّي ماقالش راحل
فجأة سابني و مشي
وسط بحر و ماله ساحل
*طب أقولك!!
خدني جنبك
هي طبعا حلوة عندك
وانت طبعا مش لوحدك
أصل قالوا بإن ليكم
إنتوا يعني الصالحين
كام ملاك يخدم عليكم
وإن ليكم حور عين
عارفه ان مكانك اريح
مافي حقنة انسولين
ولا قرص صداع و دوخة
ولا دوشة ممرضين
ولا جرح في قلب يجرح
يفضل معلٍّم بالسنين
عشان كده عندك أريح
بس وسّع حبتين
أصلي زيك آه طالعه ليك
قلبي يرتاح للبراح
و عمري ما أندم عاللي راح
بس ندمي عليك يا والدي
غصب عني و مش بيدّي
وانت زي عملة نادرة
مالك بديل ولا مثيل
ما أنا فاكره لك كتير
فاكره قد إيه كنت راجل
صاحب مبدأ و عادل
ولا تخاف من أي حد
إلا من ربك وسندك
واللي يفكر يوم يهدك
يلقى بعد الحيطة سد
مش انت عند الله في رحابه !
حايله قوله :
بنتي كانت حبيبتي وراضي عنها
هاته جنبي تبقى وًنًسٍي وأبقى وًنًسُها
اصلي سيبتها لوحدها .. جوه دنيا متعبة
وهي هبله مش هتقدر على حياه متقلبة
كانت بتتعب لما أتعب
ولما بزعل منها يوم.. ماكانتش تغلب
كانت تلف تدور تحايل
عشان اصالحها ماكانتش تتعب....
وده اللي خلّى فراقه أصعب
ليه ياولدي..!
ليه رحلت عني بدري
بُكره قطر العمر يجري
وتلاقيني جنب قبرك
ربّي سامحه برحمتك
ربي متعه في جنتك
هو رباني و أحسن تربيتي
هو كان حضن الأمان بدنيتي
هو كان ستر لأمي و أخوتي
و في يوم مسك إيديه
قال لي سامحني همشي
كنت اقوله بتمثل عليه !!
... عشان تشوف قدر محبتي ؟!!
كان يبتسم بعين دبلانه
كنت لسه صغيره مش فاهمه
كان عقلي يقولي
لسه حبّة كتير و يرحل
بس دي حكمة قدير
قدًّرً و ماشاء يفعل
ان حته من قلبي ترحل
و الدموع ملت عينيه
و عرفت قد ايه كلمة يتيمه صعبه
و إني فقدت الظهر و السند
مش بإيدي غير إني أدعي
بإن ظنّي يكون صحيح
انك برحمتة ....
أدخلك مُلكُه الفسيح
و بصحبة المصطفي
بتصلي التراويح
همس الحروف
تعليقات
إرسال تعليق